Man City ឈ្នះយ៉ាងងាយនៅថ្ងៃនៃការបង្ហាញខ្លួនលើកទី១របស់ Sterling

ការ​បង្ហាញ​ខ្លួន​ជា​លើក​ទី​១​របស់​ខ្សែ​ប្រយុទ្ធ Raheem Sterling សម្រាប់​ក្រុម Manchester City មិន​ត្រូវ​បាន​​ស្ថិត​​ក្នុង​ការ​ចាប់​អារម្មណ៍​ដោយ​សារ​តែ​កីឡាករ ​​ចាស់​ៗ ខណៈ​ដែល​ខ្សែ​បម្រើ Yaya Toure និង​ខ្សែ​ការ​ពារ Vincent Kompany បាន​រកគ្រាប់​បាល់​កាត់​សេចក្តីក្នុង​ពេលក្រុម​ខ្លួន​ទទួល​ជ័យ​ជម្នះ ៣-០ នៅលើ​ទឹក​ដីក្រុម West Bromwich Albion កាល​ពី​រាត្រី​ថ្ងៃ​ចន្ទ​។ ក្រោយពី​​បាន​មើល​ក្រុម​គូ​ប្រជែង​ទាំង Chelsea និង Arsenal ភ្លាត់​ស្នៀត​កាលពី​ចុង​សប្តាហ៍​ថ្មី​ៗ​នេះ ក្រុម​របស់​លោក Manuel Pellegrini បាន​ដណ្តើម​​យកការ​មាន​ប្រៀប​យ៉ាង​ពេញលេញ ខណៈ​ដែលពួកគេ​បាន​គេច​ផុត​ពីការ​ខក​ចិត្តក្នុងនាម​ជា​ក្រុម​ប្រជែង​ដណ្តើម​ ពាន​ក្រប​ខ័ណ្ឌ Premier League ជាមួយ​នឹង​ការ​បង្ហាញ​ពី​ទម្រង់​លេង​យ៉ាង​ល្អ​​របស់​ពួក​គេនៅលើ​ទឹក​ដី Hawthorns​។

Toure និង​​ David Silva បាន​រួម​គ្នា​ជួយ​ឲ្យ Man City មាន​គ្រាប់​បាល់​នាំមុខ​ក្នុង​រយៈ​ពេល​​ត្រឹម​តែ​៩​នាទី នៅពេល​ដែល​​ខ្សែ​បម្រើ​អន្តរ​ជាតិ​អេ​ស្ប៉ាញ Silva បាន​ធ្វើ​ឲ្យ​បាន​ផ្លាត​ចូល​ទី​យ៉ាង​​ល្អ បើ​ទោះបី​ខ្សែ​បម្រើ​អន្តរ​ជាតិ​កូត​ឌី​វ័រ Toure ត្រូវ​បាន​គេ​ចាត់​ទុក​ថា ជា​អ្នក​រក​គ្រាប់​បាល់​ក៏​ដោយ​។ Toure បានបន្ថែម​ការ​នាំមុខ​របស់ Man City ក្នុង​រយៈ​ពេល​១៥​នាទីក្រោយមក ហើយ​ខ្សែ​ការ​ពារ​អន្តរ​ជាតិ​បែល​ហ្ស៊ិក Kompany បាន​បន្ថែម​គ្រាប់​បាល់​​ទី​៣​បន្ទាប់​ពី​រយៈ​ពេល​៣០​នាទី​ដើម្បីផ្តល់​នូវ​ ការ​ជឿ​ជាក់​ដ៏​ធំមួយ​សម្រាប់ក្រុម​ម្ចាស់​ជើង​ឯក​រង​កាល​ពី​ឆ្នាំមុន​មួយ​ នេះ ដែល​បាន​​ឈរ​នៅលើកំពូល​​តា​រាង ក្រោយ​ពី​ការ​ប្រកួត​ជុំ​ទី​១​៕
ប្រភព​ព័ត៌មាន៖​ Channel News Asia